JE UNAIKUMBUKA PAN AFRIKA YA DAR ES SALAAM HIKI NDICHO KINACHOISIBU !

 

Baadhi ya wanachama wa klabu ya Pan African wameushtaki uongozi wao kwa Chama cha Soka Wilaya ya Ilala (IDFA) kwa madai ya kukiuka katiba yao ikiwa ni pamoja na kushindwa kuitisha mkutano mkuu tangu walipoingia madarakani mwaka 2009.

 

Kwa mujibu wa barua yao kwenda ya Machi 30, 2012 kwenda kwa katibu mkuu wa IDFA, wanachama hao wamedai kuwa tangu uongozi wao ulipoingia madarakani Aprili 18, 2009, haujawahi kuitisha mkutano wowote wala kushirikisha wanachama katika maamuzi yoyote yale ya klabu.

 

Taarifa hiyo iliyosainiwa na mmoja wa wanachama wa klabu hiyo aitwaye Abbas Ally (mwenye kadi namba 0075), imedai kuwa klabu hiyo pia imekuwa haina ofisi ingawa ina jengo lake la ghorofa.

 

"Jambo jingine linalotutisha ni klabu kutokuwa na ofisi yake. Tuna jengo letu ambalo uongozi umelipangisha lote na wanachama tunakosa mahali pa kupata huduma za klabu au kupata taarifa na kulipia ada za uanachama,"  ilisema sehemu ya taarifa hiyo.

 

Wanachama hao wameiomba IDFA kuushinikiza uongozi kuitisha mkutano wa wanachama na wao (IDFA) wakiwapo kushuhudia, huku wakiongeza kuwa miongoni mwa mambo ya kujadiliwa yawe ni ripoti ya mapato na matumizi kwa kipindi chote walichokaa madarakani na sababu za kupangishwa kwa jengo lao lote huku klabu ikikosa ofisi.

 

Makamu Mwenyekiti wa Pan, Ally Hemed, amesema  kuwa  asingeweza kuzungumzia madai ya wanachama na badala yake akataka atafutwe katibu mkuu wao, Saad Mateo. Mwandishi hakuweza kumpata katibu huyo na jitihada za kuwasiliana naye kupitia simu zake zilishindikana pia kwa vile zilikuwa hazipatikani.

 

Katibu Mkuu wa IDFA, Daud Kanuti, alithibitisha kupokea barua ya wanachama wa Pan na kusema kuwa walishaamua kuzikutanisha pande zote ili kujadili masuala ya klabu hiyo.