KOZI YA UONGOZI FIFA YAFIKA TAMATI LEO

 Rais wa Shirikisho la Soka Tanzania (TFF), Leodegar Chillah Tenga amesema kwamba udhamini unachangia kwa asilimia 59 pato la soka ya Tanzania, wakati mapato ya milangoni ni asilimia 29.

Tenga alisema hayo, wakati akifunga kozi ya Utawala na Usimamizi ya Shirikisho la Soka la Kimataifa (FIFA), kwenye ukumbi wa Msimbazi Centre, Dar es Salaam.

“Lakini kwa wenzetu, mechi moja tu inaingiza Sh. Bilioni 8 za Tanzania (mapato ya milangoni), ona sisi ambavyo tuko nyuma, kwa kweli tuna kazi kubwa na ngumu bado mbele yetu,”alisema Tenga.

Tenga aliwaambia washiriki wa semina hiyo ni kazi ngumu mno kuongoza soka Tanzania kutokana na mwamko mdogo na uelewa pia, hivyo akawataka washiriki wa kozi hiyo watumie vema mafunzo waliyoyapata kuongoza mchezo huo kwa ufanisi.

Tenga aliwashukuru FIFA kwa kozi hiyo ambayo ilianza Agosti 6, mwaka huu ikishirikisha wadau mbalimbali wa soka nchini, wakiwemo viongozi wa vyama vvya mikoa na wachezaji.

Kwa upande wake, Mgeni rasmi katika kufunga kozi hiyo, Meneja wa Bia ya Kilimanjaro Premeum Lager, George Kavishe, wadhamini wa timu ya taifa ya Tanzania, Taifa Stars alisema anawashukuru FIFA kwa kozi hiyo, kwani inasaidia maendeleo ya soka nchini.

“Sisi kama wadhamini wakuu wa mchezo huu hapa nchini, tunaamini mafunzo haya yatasaidia sana kuleta ufanisi katika mchezo wetu, kwa hiyo acha niseme nawashukuru na kuwapongeza FIFA,”alisema Kavishe.

Mbali na kudhamini Taifa Stars, Kilimanjaro Premium Lager, pia ni wadhamini wa klabu kongwe nchini, Simba na Yanga.

Kwa ujumla, washiriki wa kozi hiyo iliyoendeshwa na wakufunzi kutoka FIFA Dk Henry Tandau wa Tanzania, Sinca Kanyenvu kutoka Botswana na Barry Bukolo kutoka Namibia walikuwa ni viongozi kutoka TFF, Chama cha Soka Zanzibar (ZFA), vyama vya mikoa, klabu za Ligi Kuu na viongozi wa soka ya wanawake.

Washiriki wa kozi hiyo walikuwa ni Makamu wa Kwanza wa Rais wa TFF, Athumani Nyamlani, Rais wa ZFA Amani Makungu, wajumbe wa Kamati ya Utendaji ya TFF; Ahmed Mgoyi, Blassy Kiondo, Stanley Lugenge, Khalid Abdallah, Hussein Mwamba na Eliud Mvella.

Wengine ni Katibu Mkuu wa ZFA, Kassim Salum, Katibu Msaidizi wa ZFA, Masoud Attai, wenyeviti wa vyama vya mpira wa miguu vya mikoa ya Kagera (Jamal Malinzi), Dodoma (Nassoro Kipenzi) na Pascal Kihanga (Morogoro).

Makatibu wa vyama vya soka vya mikoa ya Mara (Mugisha Galibona), Mtwara (Vincent Majiri), Morogoro (Hamisi Semka), Kagera (Salum Chama), Tanga (Beatrice Mgaya) na Dodoma (Stuart Masima). Pia yumo Mwenyekiti wa Coastal Union, Ahmed Hilal na Makamu Mwenyekiti wa Yanga, Clement Sanga.

Washiriki wengine ni Katibu Mkuu wa TFF, Angetile Osiah, Mkurugenzi wa Ufundi, Sunday Kayuni, Ofisa Habari, Boniface Wambura, Mkurugenzi wa Masoko na Matukio, Jimmy Kabwe, Mkurugenzi wa Mashindano, Saad Kawemba, Ofisa Sheria wa TFF, Neema Lucumay, Ofisa wa Soka ya Wanawake, Grace Buretha, Amina Karuma (Soka ya wanawake) na Nahodha wa zamani wa Taifa Stars, Shadrack Nsajigwa.